تحدي الـ29 يوم / الخاتمة

مرحباااااااااا


خلوني اعرفكم على نفسي شوية...اني طه عبدالسلام , عمري 20 سنة...مصمم كرافك وطالب جامعي.

من فترة واني عندي حلم ان يكون عندي فلم قصير خاص بية..لكن بسبب صعوبة الموضوع وضغوطات الحياة عموماً وضغوطات الدراسة خصوصاً كنت هامل الموضوع بسبب صعوبته وبسبب ان ينرادله هواي خطوات من كتابة القصة...كتابة السيناريو..التصوير..الاخراج..اختيار ممثلين..المونتاج....اوووووو كلش هواي مراحل.
قبل لا يبدي تحدي ال29 يوم السواه مرتضى كنت بادي بكتاية السيناريو للفلم بس بدايتي كانت مو جدية ومتعثرة كلش لنفس الاسباب الكلتهة قبل شوية..مشاغل الحياة..

من بدة تحدي الـ29 يوم شفتهة فرصة ذهبية ان ارجع اشتغل على هاي الخطوة من مشروعي البسيط "صناعة فيلمي القصير الاول".
بديت ابحث بالانترنت عن مصادر اتعلم من عدهة كتابة سيناريو وانصدمت بكمية المعلومات المخيفة و الموجودة بشكل مجاني, والي تنوعت بين فيديوهات عاليوتيوب ومقالات عالمنتديات, مجموعات فيسبوك مختصة بكتابة السيناريو , بالاضافة لـ"سيناريست"(كاتبين سيناريو) مختصبن كانوا يحبون يساعدون غيرهم وينطون المعلومة بدون مقابل مثل المخرج "مصطفى الكرخي".
بس من بين كل المصادر اكثر شي فادني هو كتاب لكيته اثناء بحثي مختص بكتابة السيناريو للأفلام القصيرة..اسمه "كتابة سيناريو الأفلام القصيرة". شخصيأ اعتبرته كنز على كمية المعلومات المفيدة بيه الي كلش طورت من مستوايي اثناء الكابة :

خلال فترة التحدي واجهت كلش هواي صعوبات مثل الحر..انقطاع الكهرباء..ضعف الانترنت واصعب شي كان هو ضغط الدراسة..خصوصاً اني على ابواب امتحانات نهائية..
التقدم الحققتة بخلال فترة ال29 يوم كان كلش ممتاز وكلش راضي عنه..
خلال هاي الفترة كدرت اخلص سيناريو الفلم بالكامل وكتبت المشاهد بالكامل وبهذا اكون خلصت وحدة من اهم الخطوات لصناعة الفلم وهي كتابة السيناريو..
بس خلوني اكللكم سر زغير..صح اني حاليأ كملت كتابة السيناريو..بس مو يعني هاهية راح اعوفة لأن بعد محتاج تعديلات سواء عالقصة..او من الناحية الفنية, واكو خوش رجال نسيت اسمه سيناريست يكول : "كتابة السيناريو هو اعادة الكتابة" وفعلاً هذا الشي شفته بحيث تقريباً المشهد الواحد رجعت كتبته حوالي 5 مرات يلة استقريت عالشكل النهائي للسيناريو..هاي مقتطفات منه :

بعد نهاية هذا التحدي الجميل شي اكيد راح ابقى مستمر مع نفسي بكل يوم واكمل باقي الخطوات الى ان اشوف حلمي صار كدام عيني موجود..
بعيداً عن كتابة السيناريو..هذا التحدي ضافلي كلش هواي اشياء جديدة بحياتي اهمها خلاني اتعلم التدوين بشكل ممتاز..وتعلمت شلون اكدر انظم وقتي واوازنه ما بين الدراسة للجامعة واسوي الشي الاحبه اني واسوي شغفي.
وتعلمت ان اذا كان عند هدف فأنت تكدر تحققه وبوقت قياسي هم..بس تحتاج الشغف والهِمَة.
بالاضافة تعرفت على مجتمع كلش جميل وايجابي خلاني اغير نظرتي لهواي امور بالحياة واعيد التفكير بيهة وفعلاً هاي هي اجمل جائزة حصلتها من هذا التحدي.
بالنهاية حبيت اكول اني كلش ممتن لـ :

1- لـ"الله" سبحانه وتعالى عالنعم والصحة النطاني ياهة

2- عائلتي لأن هم كانوا السند والدعم المعنوي الي

3- لكل شخص قرر ياخذ من وقته ويفيد الغير من خبرته ولو بشي كلش قليل.

4- كل شخص تعرفت عليه بهاي الفترة وخلاني احس الدنيا بعدهة بخير.

اذا وصلت لـهنا اني اشكرك كلش لأن كملت قراية 

احبكم❤️