تحدي ال29 يوم / اليوم العاشر

هلااااااووو


اني طه اذا بعدكم تتذكروني...دا اتعلم كتابة السيناريو..وعلمود اكون دقيق معاكم..سيناريو لفلم سينمائي قصير كل يومية دا اكتب شوية من هذا السيناريو وبنفس الوقت اتابع فيديوهات تعليمية او اقرة مقالات وبنفس الوقت طبيت على كروبات مختصين بهذا المجال علمود اذا صارعندي سؤال اعرف وين اروح..
هدفي بنهاية هذا التحدي ان يكون عندي سيناريو جاهز ومتكامل وشي اكيد ناجح :)

التقدم الحققته خلال هاي ال10 ايام كتبت ما يقارب 15 مشهد وكل مشهد عدلت عليه اكثر من مرة يلة ضبط وكذلك سويت تغيير كلش كبير بحبكة القصة بعد ما اكتشفت ان عندي نقوصات واخطاء يمكن تكون كارثية..

المصادر التعلمت من عدهة كتابة السيناريو كانت كلش هواية من فيديوهات يوتيوب مثل هذا المقطع ..او مقالات عالمنتديات مثل هذا المقال .
كمية الجهد كانت حلوة ولكن نوعاً ما قليلة مقارنةً بالطموح والخطة العندي بسبب امتحانات الجامهة وضغطها وهذا الشي كان عائق الي بس مستمر..
خلال هاي الفترة تعلمت كل اساسيات كتابة السيناريو وشلون ينكتب سواء بالعربي او بالانكليزي(اكو اختلاف بالطريقة نوعاً ما) واكتشفت ان اكو نوعين لكتابة السيناريو..امريكي وفرنسي وتعلمت همات اساسيات كتابة الحبكة الدرامية والي كنت مضيع نقاطهة وما مطبقهة نوعاً ما.
الصراحة شعور كلش حلو من تكعد تسوي "عصف دماغي" وتطلع بأفكار جديدة وبنفس الوقت تحس بالفرح من تشوف كاعد تحقق تقدم بمشروعك او حلمك..
ببدايتي بهذا الشي كنت محسب كتابة السيناريو شي بسيط ومابيه اي تعقيد..بس بعد ما غصت شوية اكتشفت ان هذا عالم كامل وبيه هواي قواعد بس كلش حلوة وممتعة اذا كنتوا حابين هذا الشي.
هدفي ببداية التحدي ان يكون عندي سيناريو متكامل ( والي جزء من حلم ان يكون عندي فلم كامل) وبعدني مستمر بنفس الهدف :)



التغيير الراح اسويه بالخطة مالتي ان راح ابدي اشوف افلام تتكلم تقريباً عن نفس الموضوع ( نصيحة مهمة حصلتهة مؤخراً) واستفاد من عدهة للكتابة..خصوصاً بعد ما اكتشفت ان السيناريست ( كتاب السيناريو) يسوون هاي الخطوة قبل لا يبدون بالكتابة اصلاً 😬.
بعد التوفيق من الله..راح اكدر انهي مشروعي على موعده واعتقد التغيير الراح اسويه على خطتي ان راح ازيد الوقت للتعلم والكتابة..خصوصاً بعد ما كانت الامتحانات مشكلة ضغط كلش كبير
بال10 ايام الجاية ان شاء الله راح يكون عندي 3/4 السيناريو مكتمل وراح اكون مكتمل 100% من التعديلات عالقصة
الاشياء الممتن الهة :
1- كل الاشخاص الاخذوا من وقتهم وقرروا يسوون فيديوهات او يكتبون مقالات وينشروهة بشكل مجاني بدون ان ينتظرون اي مقابل
2- السيناريست المسوين مجموعات خاصة علمود هم يفيدون الناس بمعلوماتهم و يكدرون يجاوبون اكبر عدد ممكن من الاسئلة للكتاب المبتدئين.