اليوم ال20 / تحدي ال29 يوم

 مرحبااااا

رجعتلكم من جديد باليوم ال20 من تحدي ال29 يوم الجميل :)
الشغلة الدا اسويهة كل يوم هي ان اتعلم كتابة سيناريو لفلم قصير والي هو من الخطوات الاولى لحلمي وهو ان يكون عندي فلم قصير خاص بية والي يتكلم عن موضوع كلش مهم..هدفي ان يكون عندي سيناريو مكتمل بنهاية هذا التحدي ويكون بجودة حلوة ومحترمة.



التقدم الحققتة بالفترة الفاتت كان كلش حلوة...مثل ما كلت باخر مدونة راح ابدي اسوي تغذية بصرية لأفلام سينمائية قصيرة..بالفعل شفت اكثر من 30 فلم قصير واستفاديت من عدهة بشكل كبير بالاضافة الى ان لكيت كتاب خاص بكتابة السيناريو للأفلام القصيرة..اعتبرته هذا الكتاب كنز نوعاً ما.😁
الادوات المستخدمة هي نفسهة بالاضافة لهذا الكتاب الجميل.
التقدم الحققتة كان كلش حلو بسبب التغذية البصرية.صارت عندي معلومات عن هواي سوالف كانت مهمة وكانت عندي كم مشكلة كدرت احل عدد كبير منهة...كمية الجهد كانت حلوة بس المفروض تكون اكثر لو ما الامتحانات المشكلة ضغط كلش كبير..بس مع ذلك موازن بين وقت الامتحانات للكلية وبين دراسة السيناريو.
تعلمت هواي سوالف بهذا التحدي..باستثناء كتابة السيناريو والسوالف مالتة..تعلمت سوالف كلش حلوة عن التدوين وقواعدة..وتعلمت اهمية الالتزام الشروط من نقدم على منحة او اي تقديم بصورة عامة
المشاعر الحسيت بيهة كلش حلوة..اما فكرة ان نجرب شي جديد لأول مرة لحالة قصة.
الاشياء الفاجئتني هي نفسهة الذكرتة سابقاً.
هدفي الحالي هو نفسه من بداية التحدي..ان يكون عندي سيناريو فلم قصير متكامل.

الخطة الماشي عليهة حالياً كلش عاجبتني..خصوصاً وبعد عناء كدرت انظم ما بين وقت الدراسة للجامعة ووقت الدراسة للسيناريو والامور صارت طيبة :).
خلوني اكوللكم سر زغير..السيناريو حتى لو كمل بنهاية تحدي ال29 يوم..فهو واقعياً ما راح يكمل 100% وراح يضل يحتاج تعديلات..

اكو مقولة لخوش رجال نسيت اسمه سيناريست يكول بيهة : كتابة السيناريو هو اعادة الكتابة.
وفعلاً هذا الشي شفته..تقريباً ما عفت مشهد بحالة..كمتوسط المشهد الواحد عدلته 5 مرات قابلة للزيادة.
هدفي بال10 ايام الجاية اخلص هذا الكتاب واستفاد من عندة اقصى استفادة بالاضافة الى ان اكتب ع الاقل 10 مشاهد متكاملة جديدة.
الاشياء الممتن لها :
1- عائلتي لأن كانت السند الي
2- لنعمة الصحة والستر العندي.

وسلامتكم.